Newsletter
Name:
E-mail:

Кфар-Камэ къикIа ди лъэпкъэгъу цIыкIухэр «Адыгэ псалъэм» и хьэщIэщ

admin - 2016-08-18 18:19:05

ТхьэмахуитIым нэблэгъауэ ди республикэм щохьэщIэ Израилым щыIэ Кфар-Камэ жылэм къикIа адыгэ ныбжьыщIэ гуп.

Хэкужьым зыплъыхьакIуэ къэкIуа щIалэ гупым я нэхъыжьхэр ящIыгъуу дыгъуасэ «Адыгэ псалъэ» газетым и хьэщIэщым кърагъэблэгъат. «Адыгэ псалъэ» газетым и редактор нэхъыщхьэ ХьэфIыцIэ Мухьэмэд хьэщIэхэр кIэщIу щыгъуазэ ищIащ газетым и тхыдэм, абы и напэкIуэцIхэр дунейм къытехьэн, ар щIэджыкIакIуэхэм гурыхь ящыхъун папщIэ редакцэм щылажьэхэр абы зэрелIалIэм. Ди хэкуэгъу цIыкIухэми жаIэн я куэдт, упщIэ гуэрхэри яIэт. Ахэр я гуапэу бысымхэм ядэгуэшащ зыхуэза я хэкуэгъухэр, здэщыIа щIыпIэхэр къазэрыщыхъуам теухуа хъыбархэмкIэ.

Редакцэм и къудамэхэмрэ абыхэм щылажьэхэмрэ зрагъэцIыхуа нэужь, ныбжьыщIэхэр ирагъэблэгъащ Къэбэрдей Адыгэ Хасэм и хэщIапIэм. Хасэм и тхьэмадэ ХьэфIыцIэ Мухьэмэд хьэщIэхэм саугъэтхэр яритащ икIи адыгэбзэр яIурылъу, хабзэм, тхыдэм щыгъуазэу къызэрыхъухэм дызэрыригуфIэр, зэм-зэм я хэку къагъэзэжыну я гум къэкIыну дызэригуапэр яжриIащ. Гупым я нэхъыщхьэ Iэпщэ Рустам бысымхэм фIыщIэ яхуищIащ апхуэдэ гулъытэ къызэрыхуащIам папщIэ. ЗэIущIэм и кIэухыу фэеплъ сурэтхэр зытрагъэхащ.

ЩОДЖЭН Iэминат

adyghepsale.ru

 

Add comment

Name : *
Country :
E-mail :
Subject : *
Comment :
Users Comments