Newsletter
Name:
E-mail:

Адыгэ Республикэм нахьыбэу къыхалъхьаным зэфэшъхьэф къулыкъухэм Iоф зэрашIэрэм Премьер-министрэ ыгъэразэрэп

admin - 2016-07-23 08:02:17

УФ-м ишъолъырхэм инвестициехэр къазэрэхалъхьэрэр къэзыушыхьатырэ лъэпкъ рейтингым хэхьэрэ лъэныкъо анахьышIухэр Адыгеим къыщыдэлъытэгъэнхэм фэгъэзэгъэ штабым изэхэсыгъоу бэмышIэу щыIагъэм Адыгэ Республикэм и Премьер-министрэу КъумпIыл Мурат тхьамэтагъор щызэрихьагъ. Стратегическэ инициативэхэмкIэ Агентствэм (АСИ) илъэс къэс ащ фэдэ рейтингыр зэхегъэуцо.

Адыгэ Республикэм иминистрэхэм я Кабинет хэтхэр, уплъэкIунхэр зэхэзыщэрэ къулыкъухэм, ведомствэ зэфэшъхьафхэм ялIыкIохэр а зэхэсыгъом хэлэжьагъэх. Премьер-министрэм зэрэхигъэунэфыкIыгъэмкIэ, лъэпкъ рейтингым хэхьэрэ лъэныкъо 12-мкIэ Адыгеим хэхъоныгъэ ышIыгъ. Ау Iофхэр зыщыдэй чIыпIэхэри щыIэх.

Рейтингыр зэхэзыгъэуцохэрэм предпринимательхэм яшIошIхэр IэубытыпIэ къызыфашIых. ГущыIэм пае, ифирмэ регистрацие шIыгъэным бизнесменым уахътэу пэIуигъэхьагъэр, псэуалъэм ишIынкIэ Iизын къыратыным е электросетьхэм апашIэным уахътэу атыригъэкIодагъэр, гъунэ алъызыфырэ къулыкъухэм бизнесыр зэрауплъэкIугъэ пчъагъэр къыдалъытэх.

Адыгеим и Премьер-министрэ федеральнэ хэбзэIахь къулыкъум Адыгэ РеспубликэмкIэ и ГъэIорышIапIэрэ регион Росреестрэмрэ япащэхэм щыкIэгъэ заулэ афилъэгъугъ. Адыгэ Республикэм иминистрэхэм я Кабинет ипащэ административнэ пэрыохъухэм ядэгъэзыжьынкIэ республикэм Iофэу щашIэрэм ыгъэразэрэп.

— Предпринимательхэм Iоф адашIэ зыхъукIэ, документхэм ягъэхьазырын уахътэу пэIуагъахьэрэр амал зэриIэкIэ нахь макIэ ашIын фае. Лъэпкъ рейтингымкIэ гъэхъагъэ зиIэ шъолъырхэр ары инвесторхэм анахьэу анаIэ зытырадзэрэр. Стратегическэ инициативэхэмкIэ Агентствэм уасэу къаритырэр ахэм IэубытыпIэ къызфашIы, шъолъырым зыпкъитыныгъэу илъым ар рапхы. Лъэпкъ рейтингымкIэ Iофхэм язытет гъэтэрэзыгъэнымкIэ рабочэ купхэм япащэхэм ищыкIэгъэ предложениехэр къахьын фае, —хигъэунэфыкIыгъ КъумпIыл Мурат.

Премьер-министрэм лъэпкъ рейтингымкIэ пэрытныгъэ зыIыгъхэм яопыт зэрагъэшIэнэу, къэралыгъо IэпыIэгъу зэраратырэ программэхэм къадыхэлъытагъэу предпринимательхэм Iофэу адашIэрэр агъэлъэшынэу къяджагъ.

Зэхэсыгъом икIэухым Урысые Федерацием и Федеральнэ ЗэIукIэ ФедерациемкIэ и Совет иунашъоу «Адыгэ Республикэм социальнэ, экономикэ хэхъоныгъэ егъэшIыгъэнымкIэ къэралыгъо IэпыIэгъоу рагъэгъотыщтым ехьылIагъ» зыфиIорэр зэрагъэцакIэрэм тегущыIагъэх. Республикэм предложениеу къыхьыгъэхэр анахьэу зыфэгъэхьыгъэхэр турист-рекреационнэ комплексэу «Лэгъо-Накъэ» ишIын, автомобиль гъогоу «Адыгэкъал — Бжъэдыгъухьабл» зыфиIорэр федеральнэ мылъкум хэгъэхьэгъэныр, магистральнэ псырыкIуапIэм игъэпсын, 2018-рэ илъэсым футболымкIэ дунэе чемпионатымрэ 2017-рэ илъэсым конфедерациехэмкIэ кубокымрэ Урысыем щыкIохэ зыхъукIэ экскурсиехэр зэрэзэхащэщтхэр ары. ЫпшъэкIэ зигугъу къэтшIыгъэ лъэныкъохэмкIэ хабзэм ифедеральнэ къулыкъухэм зэпхыныгъэу адыряIэр агъэпытэнэу Премьер-министрэр къяджагъ.

adygvoice.ru

 

Add comment

Name : *
Country :
E-mail :
Subject : *
Comment :
Users Comments