Newsletter
Name:
E-mail:

Адыгабзэм пылъ хъурцэ шIэныгъэлэжьхэр Дюзджэ зэхахьэм хэлэжьагъэх

admin - 2016-06-16 23:45:01

 

ЖъоныгъуакIэм и 15 ыкIэм фэкIуагъ тырку къалэу Дюздже дэт апшъэрэ еджапIэм щыригъэкIокIыгъэ лъэпкъыбэ зэхахьэу адыгабзэм, литературым, жэрыIуабзэм, тарихъым фэгъэхьыгъагъэр.

Зэхахьэр фэгъэхьыгъагъ Рогавэ Георгийрэ КIэрэщэ Зэйнабрэ атхыгъэ «Адыгэ тхэн-зэхэтыкIэхэр» зыфиIорэр къыздэкIыгъэр илъэс 50 зэрэхъугъэм.

Адыгабзэм фэгъэхьыгъэ зэIукIэр адыгабзэкIэ, тыркубзэкIэ, инджылызыбзэкIэ, урысыбзэкIэ екIокIыгъ. Адыгэхэр бэ хъухэу зэрыс Тыркуем изыкъалэу Дюзджэм иапшъэрэ еджапIэ щырекIокIыгъэ бзэ зэIукIэм къекIолIагъэх Адыгеими, Тыркуеми, Хъурцэми нэмыкI хэгъэгухэми ащыщ шIэныгъэлэжьхэр.

Хъурцэм дэт Адыгэ культурэм игупчэ ипащэу бзэшIэныгъэлэжьэу Чухуа Мераб, Гупчэм ишIэныгъэлэжь Iэшъхьэтетхэм ащыщэу Антелава Нугзаррэ, Гупчэм иIофышIэ шIэныгъэлэжь ныбжьыкIэу Квахадзе Алеко, къалэу Тбылыс дэт къэралыгъо апшъэрэ еджапIэм КавказыбзэхэмкIэ иинститут ипащэу Барамидзе Цира зэIукIэм щыIагъэх.

Фитыныгъэ Радиом игущыIэгъугъэ Квахадзе Алеко хъурцэ, илъэс заулэ хъугъэу адыгабзэр зэригъэшIагъэу рэгущыIэ.

«Адыгэ диалектхэм язэгъэпшэн гущыIалъэ» къыдигъэкIыгъ, джырэкIэ «Адыгэ-хъурцэ гущыIалъэм» изэхэгъэуцон дэлажьэ.

Квахадзе Алеко Тыркуем щыIэгъэ зэIукIэм къытегущыIагъ адыгабзэм, апхъазыбзэм, убыхыбзэм зэлъыIэсыныгъэ чIыпIэхэу яIэхэм ащыщхэм.

Квахадзе: ЗэIукIэр дэгъу дэд адыгэ культурэм, адыгабзэм изэгъэшIэн паекIэ IэпыIэгъушI зэрэхъурэр. Адыгабзэм, апхъазыбзэм, убыхыбзэм язэпэблэгъэныгъэ фэгъэхьыгъэу къэгущыIэныгъэ сшIыгъэ .

Фитыныгъэ Радиом игущыIэгъугъэ хъурцэ бзэшIэныгъэлэжьэу Квахадзе Алеко къызэрэхигъэщыгъэмкIэ зэнэIосэныгъэ кIэхэр зэIукIэм къыщашIыгъэх.

БзэшIэныгъэлэжьхэу Дюздже зэхахьэм щыIагъэхэр къырагъэблэгъагъэх адыгабзэм, культурым фэгъэхьыгъэу Тбылыс къэблэгъэрэ уахътэм щыIэщт зэIукIэхэм ахэлэжьэнхэу.

Фитыныгъэ Радио, Щэрджэс Ларис, Тбылыс

 

Add comment

Name : *
Country :
E-mail :
Subject : *
Comment :
Users Comments