Newsletter
Name:
E-mail:

Адыгэ республикэм щыщэу Ислам Къэралым хэхьагъэхэм япчъагъэ къатхырэм нахь макI

admin - 2016-04-02 00:01:17

 

ЩынэгъончъэныгъэмкIэ къэралыгъо къулыкъум ипащэ къызэрэхигъэщыгъэмкIэ, джырэкIэ Адыгеим икIыгъэх нэбгырэ 22 , террор зехьэ купкIэ къалъытэхэрэм ахэхьанхэм пае. А Купхэм яIофшIэн ахэлажьэхэу къызэралъытэхэрэмкIэ, уголовнэ Iофи 7 къызэIуахыгъ ыкIи ахэмкIэ уплъэкIунхэр джырэкIэ рекIокIых.

АдыгеимкIэ 2015 илъэсым шэкIогъу мазэм хьыкумым унашъо къыхьыгъагъ хэкум щыщ илъэс 30 зыныбжь Шэуджэн Мурат ылъэныкъокIэ, ныбжьыкIэр «Ислъам къэралыгъо» зэзыIожьрэ купым хэхьанэу зэрэфилъыгъэм къыхэкIэу.

Ар тырку-сирие гъунапкъэм къыщаубытыгъагъ. Шэуджэным пшъэдэкIыжь ыхьынэу I илъэсрэ мэзи I0 хьапсэу тыралъхьагъ.

Фитыныгъэ радиом игущыIэгъугъэ динлэжьэу Дзэукъожь Анзор зэрилъытэрэмкIэ, адыгэ ныбжьыкIэхэм щынагъо мы IофымкIэ къашъхьащыуцуагъэу плъытэн плъэкIыщтэп.

Дзэукъожь: Ащ фэдэу щынэгъошхо сэ слъэгъурэп. А нэбгырэ 22 зигугъу къашIыгъэхэм япчъагъэ хахьэхэн фай хъулъфыгъэ нэбгырэ зы 5-6 яшъхьагъусэхэри, ясабыйхэри ягъусэхэу.

«Ислъам къэралыгъо» цIэр зыфэзышыжьыгъэ купым илэжьакIохэр ащ нэмыкI цIыфхэр хэщэгъэнхэмкIэ, щэлажьэх хъытыуми, нэмыкI лъэныкъоми. А ныбжьыкIэхэм хэкур къабгыни «Ислъам къэралыгъо» зэзыIожьрэ купым кIыхэхьагъэхэм шIошъхъуныгъэ лъапс иIэр.

Хэкум икIыжьыгъэхэм янахьыбэр унэгъо зэтегъэпсыхьагъэхэм ащыщых, ежьхэми Iоф ашIэщтыгъэ.

Фитыныгъэ радиом игущыIэгъугъэ динлэжьэу Дзэукъожь Анзор къызэрэхигъэщыгъэмкIэ, АдыгеимкIэ ыужрэ уахътэм ныбжьыкIэхэр нахьыбэу ислъам диныр алэжьы хъугъэ.

Ау мы пчъагъэр хэкум щыпсэухэрэм ателъытагъэу ащ фэдизэу инэп, еIо ащ. НыбжьыкIэхэм дин тэрэзыр арагъэлъэгъуным, зыфэдэр арагъэшIэным, къабзэу, зафэу зэрахьаным ежьри, иIофшIэгъухэри дэлажьэхэу Анзор къыхегъэщы.

Джаущтэу мэлылъфэгъу мазэм конференц щыIэнэу зыфагъэхьазырэу Дзэукъожь Анзор къыIуагъ.

Ащ къырагъэблагъэх Иорданием ыкIи нэмыкI чIыпIэхэм ащыщ динымкIэ адыгэ шIэныгъэлэжьхэр.

Зэхахьэм ипшъэрылъыр – ныбжьыкIэхэм къафаIотэныр джырэкIэ щыIэ террор зехьэ купхкIэ къалъытэрэр, ахэр зэремыхьылIагъэхэр ислъам дин шъыпкъэм, щынагъоу щыIэхэр нэмыкIхэри, къыхегъэщы Адыгеим щыщ динлэжьым.

Урысыем щыщхэу дунэе террор зехьэ купкIэ къалъытэхэрэм зэкIэмкIи нэбгырэ мини 3 фэдиз ахэтхэу джырэкIэ къалъытэх, къэбар лъыгъэIэс амалхэм къызэратрэмкIэ.

Фитыныгъэ радио, Щэрджэс Ларис

 

Add comment

Name : *
Country :
E-mail :
Subject : *
Comment :
Users Comments