Newsletter
Name:
E-mail:

Адыгабзэм и мафэ Хъурц хэгъэгум щыхагъэунэфыкIыгъ

admin - 2016-03-15 21:52:56



Адыгабзэм имафэ Хъурцэми щыхагъэунэфыкIыгъ Адыгэ Культурэм и гупчэу къалэу Тбылыс дэтым. МэфэкIым ехьылIагъэу щыIэгъэ зэIукIэм адыгэ хэкухэм ащыщ хьакIэхэри къеблэгъагъэх. Адыгабзэм имафэ къыдхэлъытагъэу зэдэлэжьэныгъэмкIэ зэгурыIоныгъэ тхьапэм кIэтхагъэх Адыгэ Культурэм иГупчэрэ Къэрэщэе-Щэрджэсым щыIэ амалхэмкIэ Гупчэмрэ. МыщкIэ бгъуитIум гугъапIэ къыхагъэщыгъ, ыпэкIэ зэдэлэжьэныгъэр фэIорышIэщтэу адыгэ-хъурцэ зэпыхыныгъэхэр гъэпытэгъэным лъэныкъо зэфэшъхьафхэмкIэ.

Мыщ фэшъхьафэу рекIокIыгъ Гупчэм къыдигъэкIыгъэ хъурцэ бзэшIэныгъэлэжьэу Букия Манана итхылъэу «Адыгабзэ-хъурцабзэ бзэ зэIукIэныгъэхэр» зыфиIорэм илъэтегъэуцо. Тхылъым еджагъэхэм къызэрэхагъэщыгъэмкIэ, ащ фэдэ IофшIагъэ джырэкIэ щыIагъэп, аущтэу убгъугъэу адыгабзэмрэ ыкIи хъурцабзэмрэ язэлъыIэсыныгъэ къэзыушыхьатрэ гущыIэхэр къыщыгъэлъэгъуагъэхэу. Букия Манана итхылъ дэхьагъэх гущыIэхэу хъурцабзэхэм къахэкIи адыгабзэм хэхьагъэхэр, етIанэ адыгабзэм къыхэкIи хъурцабзэхэм ахэхьагъэхэр, нэмыкIыбзэхэм къахэкIи мы бзитIум ахэхьагъэхэр нэмыкIхэри.

Адыгэ культурэм иГупчэ ипащэу Чухуа Мераб къызэрэхигъэщыгъэмкIэ, псынкIэу зиушъомбгъоу ары адыгэ филологием изэгъэшIэн.

Къалэу Тбылыс мы мафэхэм къеблэгъэгъэ Адыгеим щыщ сатыушIэу, адыгэ Iофым ыуж итэу, «НычIыгумкIэ фитыныгъэ» зыфиIорэ бэдауш купым ипащэу ЯхъулIэ Юрэ къыхегъэщы лъэпкъитIум язэфыщытыкIэхэм ягъэпытэнкIэ аущтэу Хъурцэм Адыгабзэм имафэ зэрэщыхагъэунэфыкIрэм мэхьанэ ин зэриIэр.

ЯхъулIэ: Гукъао, адыгабзэр зэрзэрамгъэшIэрэр. Зыбзэ зымышIэрэ, зиныдэлъфыбзэкIэ мыгущыIэрэ цIыфыр Iушы хъурэп. Адыгабзэм имафэ непэ Хъурцэм щыхагъэунэфыкIы хъумэ –кимыгъэгушIонэу щыта? Ар нэмыкI къэралыгъу, нэмыкI бзэ, нэмыкI лъэпкъ. Гум лъэшэу зеIэты, мыщ адыгабзэм пае тхылъхэр атхэу зыплъэгъурэм.

Фитыныгъэ радио, Щэрджэс Ларис, Тбылыс

 

 

 

 

Add comment

Name : *
Country :
E-mail :
Subject : *
Comment :
Users Comments