Newsletter
Name:
E-mail:

Быщтэкъо Азэмат дашIыгъэ зэдэгущыIэгъур

admin - 2016-03-05 22:56:25

 

Къыблэ шъолъырым иорэдыIо цIэрыIоу, Адыгэ республикэм ыкIи Къэбэртэе-Бэлъкъарым язаслуженнэ артистэу Быщтэкъо Азэмат иконцертхэр гъэтхапэм и 3 — 4-м тиреспубликэ и Къэралыгъо филармоние щыкIощтых. Искусствэр зышIогъэшIэгъонхэм яупчIэхэр къыдэтлъытэхи, агу рихьырэ орэдыIом гущыIэгъу тыфэхъугъ.

— СицIыкIугъом къыщыублагъэу сянэрэ сятэрэ къэшъокIо купым сыхагъахьи, лъэпкъ искусствэм зыфэзгъасэу езгъэжьагъ. Ансамблэу «Мыекъуапэ инэфылъэхэм» сыкъыщышъозэ, адыгэ музыкальнэ Iэмэ-псымэхэм сафэщагъэ хъугъэ. Пщынэм, пхъэкIычым, шъонтырыпым, фэшъхьафхэм сяпIэжъэжъэу, гум илъ орэдышъо­хэр згъэжъынчыхэу уахътэ къы­сэкIущтыгъ. ОшIа, музыкэм лъагэу зебгъэIэты зыхъукIэ, макъэкIэ уде­жъыун, орэдым хэлъ гущыIэ­хэри къэпIон фаеу охъу.

— Азэмат, нысэщэ джэгухэр зепщэхэу, мэфэкI мафэхэм уахэлажьэу бэрэ къыхэкIыгъ. Ащ фэдэ зэIукIэгъухэм сыда ахэпхыгъэр?

— Синыбджэгъу кIалэмэ ащыщ къысэдэIуи, къыстегушхуагъ. Орэд­хэр дискым тестхэнхэу къысэушъыигъ. Бэ тесымыгъашIэу Iофым сыфежьагъ, орэдхэр къызэкIэлъы­кIуагъэх.

— Апэрэ орэдэу тептхагъэр къэошIэжьа?

— Ары, ау ар къэсIожьырэп. Орэдыр шIулъэгъуныгъэм фэгъэ­хьыгъагъ, урысыбзэкIэ къэсIуагъ. Адыгэ орэдхэм мэхьанэу, къэ­IуакIэу яIэр нахь сшIогъэшIэгъон зэхъум, сафэкъаигъэу зафэзгъа­сэу езгъэжьагъ.

— КъапIорэ орэдхэр уикIасэх, къахэпхыщтым сыкъыкIэупчIэрэп.

— Аужырэ илъэситIум къасIо­рэмэ ащыщэу Тхьабысымэ Умарэ иорэдэу «Си Адыгееу, сихэкур» сыгу хэпкIагъэу шIу сэлъэгъу. «Тэ укIорэ, си Гуаго? Къэгъэзэжь» зыфиIорэр зэкIэми къахэсэгъэщы. Бэгъ Нурбый ыпхъоу Сусанэ орэдым хэлъ гущыIэхэр къызысетыхэм, сшIогъэшIэгъонэу сяджагъ. Усэр къызэрыкIоп, мафэ къэс зэхэтхырэмэ афэдэп. Композиторэу Андзэрэкъо Чеслав орэдышъор дахэу зэригъэфагъ. Дунаим щыцIэрыIо ансамблэу «Ислъамыем» мы орэдым щыщ пычыгъохэр къеIох, ау сэ сире­пертуар хэзгъэхьагъэр ащ нэмы­кIыIоу гъэпсыгъэ…

Азэмат нэшIукIэ къысэплъи, шъабэу Iэгу теозэ орэдыр къыхидзагъ. ГущыIэ пэпчъ уедэIу, зэхэошIыкIы.

— Азэмат, орэдэу къыхэ—удза­гъэм тигъэзетеджэхэр къыкIэ­лъэIух — къыхэтыуты ашIоигъу. Шъхьафэу тытегущыIэ сшIоигъу а орэдым икъэхъукIэ, сценэшхом къытепхьанэу зэрэхъугъэм.

— Дэгъу, сигуапэу зэдэгущы­Iэгъум сыкъыхэлэжьэщт.

Дэхагъэм орэд къыфеIо

— «Сидахэ», «Сидэхэ­цIыкIу», «СидэхэкIай», «Сидахэ, уей», нэмыкI орэдхэр пшъашъэм фэгъэхьыгъэх. Дэхагъэм къибгъэкIырэр къытаIоба.

— ЦIыфыр ыгукIэ къэбзэн, дэхэн фаеу зылъытэрэмэ адесэгъаштэ. Адыгэ Республикэмрэ Къэбэртэе-Бэлъкъарымрэ якомпозиторхэм аусыгъэ орэдхэр арых зыцIэ къепIуагъэхэр. Зэфэшъхьаф шъолъырхэм ащэпсэухэми ягутео, шIулъэгъум еп­лъыкIэу фыряIэр зэфэдэу къэ­лъагъо. Тхьабысымэ Умарэ иорэдхэр нахьыбэ хъухэу къэсIощтых. Лъэпкъым, шIулъэгъум, искусствэм ар дахэу афэусагъ.

— ОрэдыкIэу къапIохэрэм Нэгъуцу Саидэ ыусыгъэхэр ахэтых.

— Сшыпхъум фэдэу Саидэ сэгъэлъапIэ. Орэдхэр къысфитхыгъэх. «СидэхэцIыкIур» къахэсэгъэщы.

— Нэчэс Анжеликэ иорэдхэр…

— Анжеликэ бэшIагъэу гъусэныгъэ дысиI, тапэкIи тызэдэлэжьэщт.

— ОрэдыIом зыкъызэ­Iуихыным фэшI ныбжьэу иIэм елъытыгъэр ба?

— МакIэп. Сыныбжь емылъы­тыгъэу орэдхэр къэсэIох. Сызфежьэрэ Iофыр згъэ­цакIэ сшIо­игъу. Адыгэ шэн-хабзэхэр, адыгэ орэдыр, адыгэ культурэр — ахэр зэпхыгъэх. Тарихъ гъогоу тилъэпкъ къыкIу­гъэри пщыгъупшэ хъухэщтэп. Адыгабзэм изэгъэшIэнрэ игъэфедэнрэ сценэшхом къызэрэтепхьащтхэр, нэ­мыкIхэри тызгъэгу­мэкIхэрэм ащыщых.

Зэхахьэр рамыгъажьэзэ

Филармонием идиректор шъхьаIэу ЛIы­шэ Рустем къызэрэ­ти­Iуагъэу, Быщтэкъо Азэмат иконцертхэм нэбгырабэ къакIэуп­чIэ. Къыблэ шъолъы­рым икъалэхэм къа­ры­кIыщтхэри Мые­къуапэ щытлъэгъу­щтых.

— Телевидением ия 9-рэ канал тигуа­пэу теплъы, — къе­Iуа­тэ Адыгэ Республикэм изаслуженнэ журналистэу ЛъэпцIэ­рышэ Къунчыкъо. —Тхьамафэ къэс орэдэу къатыгъэ­хэм, артистэу агу рихьырэм яхьы­лIэгъэ зэфэхьысыжьхэр ашIых. 2014-рэ илъэсым гъогогъу 37-рэ Быщтэкъо Азэмат апэрэ чIыпIэр къыдихыгъ. 2015-рэ илъэсым гъо­гогъу 45-рэ текIоныгъэр къыфагъэ­шъошагъ. ЕтIанэ сшIогъэшIэгъоныр Урысыем икъалэхэм ащыпсэурэмэ адыгэ орэдэу Азэмат къы­Iохэрэр къызэрэхахыхэрэр ары.

Бзылъфыгъэхэм я Мафэ ехъу­лIэу А. Быщтэкъом иконцертхэр филармонием щызэхащэщтых. Артист цIэрыIоу Нэфышъэ Чэри­мэ нэIуасэ зэрэфэхъугъэм, нэмыкI къэбарэу Азэмат къытфиIотагъэ­хэм концертхэм ауж тигъэзет­е­джэхэр ащыдгъэгъозэщтых.

Опсэу, Азэмат! Тхьэм бэгъашIэ уешI. Мэкъэ дахэкIэ, гу къабзэкIэ къапIорэ орэдхэр гъунджэу къэ­жъы­урэм щызэпэшIэтых, цIыфхэм алъэIэсых, гушIуагъо къафахьы. Орэдым регъэгупшысэх.

adygvoice.ru

Add comment

Name : *
Country :
E-mail :
Subject : *
Comment :
Users Comments