Newsletter
Name:
E-mail:

Шъоф Плъыжьым и Мафэ ихэгъэунэфыкIын адыгэ бэдаушхэр езэгъыхэрэп

admin - 2016-02-17 19:47:09

 

Адыгэхэм Яшъыгъо-ШIэжъ мафэу жъоныгъуакIэм и-21 хагъэунэфыкIрэм тефэу Шъоф Плъыжьым (Шъачэ идэжь) и Мафэ агъэмэфэкIынэу зэрагъэнафэрэмкIэ хъытыум къэбарэу къихьагъэмкIэ адыгэ бэдаушыбэмэ емызэгъхэр къыхагъэщыгъэх.

Бжыхьэм агъэмэфэкIыщтыгъэ Шъоф Плъыжьым иМафэ гъатхэм, адыгэмэ яшIуцIэ мафэ тефэу хагъэунэфыкIыным икIэщакIохэр Шъоф Плъыжьым игъэIорышIапI.

Ащ ихъытыу нэкIубгъо мыщ тефэрэ къэбарыр къыригъэхьэгъагъ щылэ мазэм и 20. Адыгэ бэдаушмэ ащыщэу джырэкIэ Мэзкуу щыIэм мы Iофыр къызхэкIрэр зэхифынэу гъэIорышIапIэм зафытео нэуж хъытыум итыгъэ къэбарыр зэрахъокIыжьыгъэ.

Бэдаушмэ къызэратхрэмкIэ, жъоныгъуакIэм мэфэкIыр щыIэщтэу ары зэрашIыжьыгъэр, мафэр гъэнэфагъэу пымытыжьэу.

Мыщ фэдэу адыгэмэ Яшъыгъо ШIэжь мафэ Шъоф Плъыжьым иМафэ игъэмэфэкIын зыкIытырагъфэгъагъэмкIэ адыгэ бэдауш лэжьакIомэ, шIэныгъэлэжь зырызмэ еплъыкIэ зэфэшъхьафых къыхагъэщыгъэхэр.

Зыхэм къаIуагъ мыр хэукъоныгъэу, адырэхэм – къызэкIэгъэблэныгъэу, нэмыкIхэм-Урысыем изэхэтэкъоныгъэ икъэгъэлъэгъонэу.

Къэбэртэе – Бэлъкъарым щыщ бэдаушэу Фитыныгъэ радиом игущыIэгъугъэ Бешто Аслъан зэрилъытэрэмкIэ, адыгэмэ апае шIу зыгори мы Iофым хэмылъыгъэу ары. ЫкIи ащ фэдэ къэхъу-къашIэм зэхэфыныгъэ хэмылъэу къэбгъанэ зэрэмыхъущтыр къыхигъэщыгъ.

Бешто: Къэхъугъэр джыри ыкIэм нэсэу къыдгурыIуагъэу щытэп. Ау щэч хэмылъэу къэпIошъущт ар зыкIэхъугъэми, ылъапсэми зыгорэм игупшысэ бзаджэ зэрэхэлъыр. ЗышшIагъэри тхьам ешI, ау тэщ пае зыгорэ зэрамышIагъэр нафэ. Мыщ фэдэм тыпэуцун фае, зэрэтымыдэрэр къядгъэшIэн фае. Джаущтэу тызэремызэгъыгъэм пае сайтым къырагъэхьагъэ мэкъэгъэIур зэблахъужьыгъэ, Шъоф Плъыжьым иМафэ игъэмэфэкIын нэмыкI мафэм зэрахьыжьрэм фэгъэхьыгъэр.


Адыгэмэ ялъэпкъгъэкIодэу я I9 лIэшIэгъум урысые пачъыхьагъум зэрихьагъэр къэзыштэгъэ шъхьафит къэралыгъо закъор – Хъурцэр ары, 20II илъэсым жъоныгъуакIэм и 20.

Фитыныгъэ радиом игущыIэгъугъэ хъурцэ политологэу, Кавказ IофхэмкIэ кIэлъыплъакIоу, адыгэ Iофым икIэлъыплъэнрэ изэгъэшIэнрэ пылъ Лебонидзэе Соломон зэрилъытэрэмкIэ, ащ фэдэ мэфэ тегъэфэныгъэм ылъапс – адыгэ лъэпкъгъэкIодыр цIыфмэ ащагъэгъупшэжьыгъэпэныр.

Лебонидзе: ЩытыкIэр мыщ фэд. Хъурцэм адыгэ лъэпкъгъэкIодыр къызиштагъэ нэуж Урысые къэралыгъор филъыгъ сыд фэдэуи, ыкIи джыри фелъы а къэхъу-къашIэр чIиухъумэнэу ыкIи ащ ифэмэ-бжьымэ къыригъэохынэу.

Хъурцэм иунэшъошI зызэблэхъугъэм къыщежьэу Темыр Кавказ политикым, адыгэ упчIэри ахэтэу, анаIэ нахь макIэу тырагъэты хъугъэ.

Шъоф Плъыжьым имафэ кIытырагъафэрэр Адыгэ Шъыгъо-ШIэжь мафэм – ыужырэр Iухыжьыпагъэ хъуным паеу, жъоныгъуакIэм и 21 къэхъугъэр цIыфмэ ащагъэгъупшэжьынэу ашIэу сеплъы.


Адыгэмэ зэралъытэрэмкIэ, Шъоф Плъыжьыр, е Къбаадэ, ялъэпкъгъэкIод итамыгъ. Ащ дэжьым I864 илъэсым жъоныгъуакIэм и-21 адыгэхэмрэ урысые пачъыхьагъум идзэрэ азфагу Кавказ заом иаужрэ зэоныгъэшъхо къыщыхъугъ.

Урысые пачъыхьагъум итекIоныгъэ ащ дэжьым ешхэ-ешъокIэ щаухыгъагъ. Адыгэмэ мы мафэр Яшъыгъо-ШIэжь маф. Заом къыхэкIэу адыгэмэ я% 90 къехъур аукIыгъ е рафыгъэх ячIыгу. ДжырэкIэ адыгэхэр дунаим икъэралыгъо 50 къехъум арытэкъухьагъэх.

Фитыныгъэ радио, Щэрджэс Ларис

 

Add comment

Name : *
Country :
E-mail :
Subject : *
Comment :
Users Comments