Newsletter
Name:
E-mail:

Дышъэ къэзыхьырэм уегъэгугъэ

admin - 2016-02-10 20:25:46

Урысые Федерацием самбэмкIэ изэнэкъокъу Нижегород хэкум икъалэу Кстово щыкIуагъ. Илъэс 16 — 18 зыныбжьхэр апэрэ чIыпIэхэм афэбэнагъэх. Адыгэ Республикэм самбэмкIэ икIэлэцIыкIу-ныбжьыкIэ спорт еджапIэ зыщызыгъэсэрэ ЦIыкIу Рэмэзан дышъэ медалыр зэIукIэгъухэм къащыдихыгъ.

СамбэмкIи, дзюдомкIи ЦIыкIу Рэмэзан зэнэкъокъухэм ахэлажьэу бэрэ тэлъэгъу. КIалэм ихэхъогъу, исэнаущыгъэ къызэ­IуихынымкIэ чIыпIэшIу ит. Спорт лъэпкъитIумэ ахэдэн фаеу уахътэ къекIущтэу тренерхэм къаIо. Непэ нарт шъаом самбэмкIэ гъэхъагъэу ышIырэм уегъэгу­шхо.

Гъогу техьаным ыпэкIэ

Нижегород хэкум ежьэным ыпэкIэ ЦIыкIу Рэмэзанрэ тренер-кIэлэегъаджэхэмрэ гущыIэгъу тафэхъугъ. Адыгэкъалэ ия 3-рэ гурыт еджапIэ ия 11-рэ класс Р. ЦIыкIур щеджэ. Ныбджэгъу­шIухэр иIэх.

— Хэгъэгум иныбжьыкIэхэм язэIукIэгъухэм гъогогъуитIо сам­бэмкIэ дышъэ медальхэр ЦIыкIу Рэмэзан къащыдихыгъэх, — къеIуатэ Адыгэкъалэ икIэлэцIыкIу-ныбжьыкIэ спорт еджапIэу Джамырзэ Азмэт ыцIэкIэ щытым идиректорэу Чэтыжъ Алый. — Урысыем икIэлэеджакIохэм я Спартакиадэу Ермэлхьаблэ щызэхащагъэм дышъэ медалыр къыщыфагъэшъошагъ. Рэмэзан гуетыныгъэ ин хэлъ, спортсмен цIэрыIо хъун ылъэкIыщтэу тегъэ­гугъэ.

Чэтыжъ Алый тренерэу Iоф ышIэзэ ыгъэсагъэхэм ащыщэу Шъэумэн Байзэт ары ЦIыкIу Рэмэзан ипащэр. Адыгэкъалэ зэлъашIэрэ спортсменхэр, тренерхэр къыдэкIыгъэх. Байзэт къызэриIорэмкIэ, щысэ зытырихыщтхэр непи къалэм дэсых.

— СССР-м изаслуженнэ тренерэу Хьатэгъу Адам, тиспорт еджапIэ ипащэу Чэтыжъ Алый, нэмыкIхэри упчIэжьэгъу сэшIых, — къеIуатэ Шъэумэн Байзэт. — Спортым изакъоп, тари­хъым, лъэпкъ шIэжьым, кIэлэеджакIохэм яIофыгъохэм татегущыIэ. Самбэм фэзгъасэхэрэм ЦIыкIу Рэмэзан иIэпэIэсэныгъэкIэ къахэщы.

Кстово Рэмэзан зыкIокIэ ды­шъэ медалым зэрэфэбэнэщтыр зышIэщтыгъэхэм ащыщ дунаим самбэмкIэ ичемпионэу Мэрэтыкъо Сахьидэ.

Тыркуем кIуагъэп

— Европэм иныбжьыкIэхэм язэнэкъокъоу Тыркуем щызэхащэрэм ЦIыкIу Рэмэзан хэлэжьэ­нэу зигъэхьазырыгъагъ, — къы­щиIуагъ спорт еджапIэм щыкIогъэ зэхахьэм Мэрэтыкъо Сахьидэ. — Урысыемрэ Тыркуемрэ язэ­фыщытыкIэхэр нахь дэи зэрэ­хъу­гъэхэм, дунэе Iофыгъохэм къа­хэкIэу тиспортсменхэр Тыркуем агъэкIуагъэхэп. ЦIыкIу Рэмэзан Европэм идышъэ медаль фэбэнэнэу хъугъэп…

— ЦIыкIу Рэмэзан адыгэ шъыпкъ, — зэдэгущыIэгъур лъе­гъэкIуатэ Мэрэтыкъо Сахьидэ. — Урысыем идышъэ медаль Кстово къыщыдихынышъ, дунаим изэIукIэгъухэм ахэлэжьэнэу мурад ышIыгъ.

Гу пытэ зиIэ нарт бланэм игущыIэ къызэригъэшъыпкъэжьы­гъэр зымыуасэ щыIэп.

Дышъэм зэрэфэбэнагъэр

Урысыем иныбжьыкIэхэм сам­бэмкIэ язэIукIэгъухэу Кстово щы­кIуагъэхэм бэнэкIо 600-м нахьыбэ ахэлэжьагъ. ЦIыкIу Рэмэзан килограмм 52-м нэс къэзыщэчырэмэ янэкъокъугъ.

— Бэнэгъуи 8 Рэмэзанэ алырэгъум щыриIагъ, — зэIукIэгъухэр зэрэкIуагъэхэм тащегъэгъуазэ Адыгэ Республикэм самбэмкIэ икIэлэцIыкIу-ныбжьыкIэ спорт еджа­пIэ ипащэу, спортымкIэ дунэе класс зиIэ мастерэу Делэкъо Адамэ. — ТигъэгушIоным ыпэкIэ лъэшэу тигъэгумэкIыгъ.

Европэм ыкIи дунаим яныб­жьыкIэхэм дзюдомкIэ язэнэкъо­къухэм дышъэ медальхэр къащыдэзыхыгъэ Рустам Заболотнэр Дагъыстан икомандэ хэтэу Кстово самбэмкIэ щыбэнагъ. Р. ЦIыкIур ащ зыIокIэм, пхъашэу ебэныгъ, текIоныгъэр къышIуи­хьыгъ.

Дышъэ медалым фэгъэхьыгъэ зэIукIэгъум Эдуард Мурадянрэ ЦIыкIу Рэмэзанрэ щызэпэуцу­гъэх. БлэкIыгъэ илъэсым Урысы­ем изэнэкъокъу зыщызэIо­кIэхэм, Ермэлхьаблэ илIыкIоу Э. Мура­дян апэрэ чIыпIэр судь­яхэм фа­гъэшъошэгъагъ.

— Кстово сыщыбанэзэ, сымы­гумэкIын слъэкIыщтыгъэп, — къеIуатэ кIэлэ нэгушIоу Р. ЦIы­кIум. — Мыекъуапэ зэIукIэгъур щыкIоу загъорэ къысщыхъущтыгъ. «ЫIэ фэсакъ, пытэу земыгъэубыт», нэмыкI адыгэ гущыIэхэр алырэгъум щызэхэсхыщтыгъэх. КъысаIорэм сыгу ыгъэпытэщтыгъ, текIоныгъэр къыдэсхыным фэшI кIуачIэр нахьышIоу згъэфедэ­щтыгъ.

Э. Мурадян Iэ сэмэгур на­хьышIоу егъэфедэ, ыпэкIэ къы­зилъкIэ, зэтепIэжэныр псынкIэп. А. Делэкъом, Б. Шъэумэным, С. Мэрэтыкъом, нэмыкIхэм ар къыдалъыти, ЦIыкIу Рэмэзан пэшIорыгъэшъэу бэнэгъум фагъэ­хьазырыгъ. Рэмэзан пытэу алырэгъум зэрэтетым дакIоу, псын­кIэу гупшысэщтыгъ, шIыкIэ зэфэшъхьафхэм алъыхъущтыгъ. Къыобэнырэр къызщыбгъэщынэн зэрэфаер адыгэ кIалэм зыщигъэ­гъупшагъэп, дунаим идышъэ медаль къыдэзыхыгъэ Э. Мура-дян гугъэшхо римытэу 6:1-у те­кIуагъ.

Зэфэхьысыжьхэр

Адыгеим ибэнакIохэм ащ фэдэ гъэхъагъэ аужырэу зашIыгъагъэр илъэси 5-м къехъугъ. Адыгеим исамбэ зыкъегъэIэтыжьыгъэным фэшI еджапIэр гъогу тэрэз тетэу плъытэ хъущт.

Адыгэкъалэ имэрэу Хьатэгъу Налбый, спортымкIэ къалэм, республикэм япащэхэм къыхагъэ­щырэр ЦIыкIу Рэмэзан лъэпкъ шэн-хабзэхэр зэрихьэхэзэ ыпэкIэ зэрэлъыкIуатэрэр ары.

ФэгушIуагъэх

Мэзаем и 8-м республикэ спорт еджапIэм щыкIогъэ зэхахьэм ЦIыкIу Рэмэзанрэ ащ итренерэу Шъэумэн Байзэтрэ къырагъэблагъэхи, гущыIэ фабэхэр афаIуагъэх. Делэкъо Адам, Хьэпэе Хьамид, Мэрэтыкъо Са­хьид, Хьакурынэ Дамир, Джармэкъо Аслъан, фэшъхьаф тренер-кIэлэ­егъаджэхэр дышъэ медалыр къыдэзыхыгъэм фэгушIуагъэх.

Тиреспубликэ иобщественнэ движениеу «Адыгэ Хасэм» итхьаматэу, спортымкIэ мастерэу ЛIымыщэкъо Рэмэзан, хасэм игъэцэкIэкIо куп хэтэу спортым имастер хъунымкIэ кандидатэу Нэхэе Аслъан, дунаим самбэмкIэ ичемпионэу Алхъо Сыхьатбый зэхахьэм къыщыгущыIагъэх. Спор­тымрэ пIуныгъэмрэ зэрэзэпхыгъэ­хэр ягупшысэхэм къащыхагъэщыгъэх, нэпэеплъ сурэтхэр атырахыгъэх.

Дунаим иныбжьыкIэхэм сам­бэмкIэ язэнэкъокъоу Румынием бжыхьэм щыкIощтым ЦIыкIу Рэ­мэзан хэлэжьэщтышъ, имедальхэм ахигъэхъонэу тыфэлъаIо.


ЕмтIылъ Нурбый.

Сурэтхэм арытхэр: Шъэумэн Байзэт, ЦIыкIу Рэмэзан, Чэтыжъ Алый; еджапIэм щыкIогъэ зэхахьэм хэлэжьагъэхэр.

adygvoice.ru

 

Add comment

Name : *
Country :
E-mail :
Subject : *
Comment :
Users Comments