Newsletter
Name:
E-mail:

Джигетиемрэ джигетхэмрэ афэгъэхьыгъэ зэхахьэ Хъурцэм щэкIо

admin - 2015-12-11 22:57:15

 

Хъурцэм тыгъэгъазэм и 11 щыригъэжьагъ дунэе конференцэу Джигетиемрэ джигетхэмрэ(е зиххэм) лъэпкъкIэ зыфэгъэхьыгъэхэм якъэгъэнэфэн епхыгъэр.

ЗэIукIэм икIэщакIор Тбылыс дэт Адыгэ Культурэм Игупч. Зэхахьэр фэгъэхьыгъ зэлъашIэрэ хъурцэ бзэшIэныгъэлэжьэу Рогава Георгий къызщыхъугъэр илъэси 110 мыгъэ зэрэхъурэм.

Рогава Георгий адыгабзэм итхэн-хабзэхэмкIэ тхылъыр зэхэзгъэуцуагъэхэм ащыщ. Хъурцэм щекIокIрэ конференцым хэлажьэх IэкIыбыми, Темыр Кавказыми къарыкIыгъэ адыгэхэр, хъурцэ шIэныгъэлэжьхэр нэмыкIхэри.

ЗэIукIэм къыдхэлъытагъэу тхылъитIумэ ялъэтегъэуцо рекIокIыщт. Зы тхылъыр адыгэ тхэкIо ныбжьыкIэм иусэ угъоигъэхэу хъурцабзэкIэ зэдзэкIыгъэхэмрэ хъурцэ тхэкIо цIэрыIоу Пшавелэ Важэ ипоэмэу «ХьакIэмрэ бысымымрэ» зыфиIорэу адыгабзэкIэ зэдзэкIыгъэр зыдэхьагъэр ары.

Адыгэ Кудьтурэм Игупчэу Тбылыс дэтым ипащэу Чухуа Мераб къызэрэхигъэщыгъэмкIэ, ащ фэдэ темымкIэ конференцыр ошIэ-дэмышIэу ашIыгъэп.

Чухуа: Мыр ошIэ-дэмышIэу къыхэтхыгъэп. Джигетием итемэ гъэшIэгъон ыкIи ишъыпкъэу щыт Хъурцэм итарихъкIэ.

ЯкъыхэкIкIэ а цIыфхэр адыгэхэу щытыгъэх. Ахэр Хъурцэм щыпсэущтыгъэх, Апхъазым, Гагрэ къыщегъэжьагъэу псыхъоу Псоу нэсфэ, къалэу Шъачэ нэсыпэрэп.

Джигетхэр Хъурцэм ицIыфыгъэх, ахэр илъэс 2000 кIахьэу Хъурцэм щыпсэущтыгъэх , I870 илъэсым нэс ыкIи къэралыгъом итегъэкъон кIуачIэу щытыгъ. Сэ сшъхьэкIэ сэлъытэ, ахэр елыегъэ адыгэ купэу Хъурцэ къэралыгъом хэтыгъэх, япшъэрылъыгъ тикъэралыгъо итемыр гъунапкъэхэр къаухъумэныр. Апхъазхэми, хъурцэхэми ахэтхэу а чIыпIэм джигетхэр щыпсэущтыгъэх.

Фитыныгъэ радио: Джигетиемрэ джигетхэмрэ яупчIэ сыд фэдизэу зэгъэшIагъэу, ушэтыгъэу щыта?

Чухуа: ТызэрегупшысэщтыгъэмкIэ, мы упчIэр тIэкIоу тарихъым къыщхэгъэщыгъэу щытыгъэу ары, ау, къызэрэчIэкIыгъэмкIэ, шIэныгъэлэжьхэми къыздырагъаштэ, ахэр – джырэ Апхъазым щыщхэм апэкIэ итыгъэх, Хъурцэ къэралыгъом хэтхэу.

Фитыныгъэ радиом игущыIэгъугъэ хъурцэ шIэныгъэлэжьэу Чухуа Мераб къызэрэхигъэщыгъэмкIэ, Тыркуем джырэкIэ щыпсэурэ нэбгырипшI фэдизмэ къаIуагъ ахэр егъэзыгъэхэу урысые пачъыхьагъум рагъэкощыкIгъэгъэ джигетхэу, Хъурцэм, Апхъазым, щыпсэущтыгъэхэм къазэрэтекIыгъэхэр.

ДжырэкIэ Хъурцэм илъэпкъэгъухэу зэрэщытымкIэ ицIыфхэу ащ къылъытэхэрэм аритрэ лъэгапIэм ишапхъэхэм къадхэлъытагъ, Джигетием щыщыгъэхэм къатекIыгъэхэр Хъурцэм илъэпкъэгъухэу зэрэхъушъущтхэр.

Фитыныгъэ радио, Щэрджэс Ларис

 

Add comment

Name : *
Country :
E-mail :
Subject : *
Comment :
Users Comments