Newsletter
Name:
E-mail:

Адыгэ Республикэм щыщ ныбжьыкIэ бэнакIохэм медал 3 къахьыгъ

admin - 2015-10-28 17:26:48

 

Урысые Федерацием самбэмкIэ икIэух зэнэкъокъу Нижегород хэкум щыкIуагъ. Адыгэ Республикэм икIэлэцIыкIу-ныбжьыкIэ спорт еджапIэ зыщызыгъэсэрэ кIалэмэ алырэгъум медалищ къыщахьыгъ,- къетхы гъэзетэу Адыгэ Макъэм.

1999 - 2000-рэ илъэсхэм къэхъугъэхэр бэнэгъухэм ащызэ­IукIагъэх. Адыгэкъалэ щапIугъэ ЦIыкIу Рэмэзанэ килограмм 50-м нэс къэзыщэчырэмэ янэкъо­къугъ. Купым нэбгырэ 40 фэдиз хэтыгъ. Р. ЦIыкIум икъулайныгъэ ыгъэфедэзэ, ибэнэгъу­хэр къыхьыгъэх. Дышъэ медалым фэгъэхьыгъэ кIэух зэIукIэ­гъум адыгэ кIэлитIу щызэнэкъо­къугъ. ЛIышэ Хьарунэ Краснодар краим икомандэ хэт, Шъхьащэфыжь щапIугъ. Рэмэзанэ кIуа­чIэмрэ къулайныгъэмрэ зэдиштэхэу нахьы­шIоу ыгъэфедэхи, текIоныгъэр къыдихыгъ.

Европэм изэнэкъокъу Тыркуем тыгъэгъазэм ныбжьыкIэхэм азыфагу щыкIощт. Нарт шъаоу ЦIыкIу Рэмэзанэ ныбжьэу иIэм елъытыгъэу зэнэкъокъум хэлэжьэнэу фитыныгъэ иIэ хъугъэ. Тренер-кIэлэегъаджэу Шъэумэн Байзэт ипащэу зэIукIэгъухэм зафигъэхьазырыщт.

Адыгеим самбэмкIэ икIэлэ­цIыкIу-ныбжьыкIэ спорт еджапIэ идиректорэу Делэкъо Адамэ тызэрэщигъэгъозагъэу, зэхэщакIо­хэр тиспортсменхэм къащытхъу­гъэх. Къунчыкъохьаблэ щыщ Хьажэукъо Заурбый, кг 50, ящэ­нэрэ чIыпIэр къыдихыгъ. Тренер-кIэлэегъаджэу Къуекъо Руслъан ары зыгъасэрэр. Тренер ныбжьыкIэу Хьакурынэ Дамир зипэщэ Варткез Акопян, кг 84-м къехъу, джэрз медалыр къызэрэдихыгъэр гъэхъагъэу плъытэн плъэкIыщт.

 

Add comment

Name : *
Country :
E-mail :
Subject : *
Comment :
Users Comments