Newsletter
Name:
E-mail:

Адыгэ Республикэм и Премьер-министр дзюдомкIэ медалхэр къэзыхьыгъэхэм аIукIагъ

admin - 2015-10-15 11:03:06

 

Адыгэ Республикэм и Премьер-министрэу КъумпIыл Му­рат дзюдомкIэ тренерэу Беданэкъо Рэмэзан ыкIи ащ ыгъэсэхэрэ спортсменхэу Ордэн Андзауррэ ШъэоцIыкIу Рустамрэ мы мафэхэм аIукIагъ. Ащ хэлэжьагъ Адыгэ Республикэм физкультурэмкIэ ыкIи спор­тымкIэ и Комитет итхьаматэу Хьасанэкъо Мурат.

Спортсменхэм бэмышIэу ашIыгъэ гъэхъэгъэшIухэр къа­Iотагъэх. Студентхэм я Дунэе гъэмэфэ Универсиадэу Къыблэ Кореим щыкIуагъэм Ордэн Андзаур хэлэжьагъ. Ар килограмм 66-м нэс къэзыщэчырэмэ янэкъокъугъ ыкIи джэрз медаль къыфагъэшъошагъ.

Урысые Федерацием дзю­домкIэ изэнэкъокъоу Iоныгъом Красноярскэ щыкIуагъэм ти­бэнакIоу ШъэоцIыкIу Рустам ятIонэрэ чIыпIэр къыщыдихыгъ. Ар килограмм 73-м нэс къэзыщэчырэмэ ябэныгъ.

Зыгъэсэхэрэ тренерым ыкIи спортсменхэм гъэхъэгъэшIухэр зэряIэм фэшI КъумпIыл Мурат афэгушIуагъ, ахъщэ шIухьаф­тынхэр аритыгъ.

- Тренер купым IофшIэ­нышхо зэрехьэ. КIэлэцIыкIу-ныбжьыкIэ спорт еджапIэм сэнаущыгъэ ин зыхэлъ спортсменыбэмэ зыщагъасэ, ау уIэ­пэIэсэ закъокIэ гъэхъагъэ пшIы­шъущтэп. ШъэоцIыкIу Рустамрэ Ордэн Андзауррэ текIоныгъэхэр къыдахынхэм пае емызэщхэу, кIуачIэ халъхьэзэ мафэ къэс Iоф зыдашIэжьы. Зэрэныбжьы­кIэхэм емылъытыгъэу, нэбгырабэмэ ахэр джы ящысэте­хыпIэх. Республикэм дзюдом зыщиушъомбгъунымкIэ ащ мэхьанэ иI. Джащ фэдэу, Адыгеим и ЛIышъхьэу ТхьакIущынэ Аслъан пшъэрылъэу къытфишIы­гъэм диштэу, олимпийскэ спорт лъэпкъхэм ащыщэу дзюдом хэ­щагъэхэм IэпыIэгъу тафэхъуным тынаIэ тедгъэтыщт, - къыIуагъ АР-м и Премьер-министрэ.

Беданэкъо Рэмэзан Премьер-министрэм «тхьауегъэпсэу» ри­Iуагъ. Джащ фэдэу спортсмен­хэм ящыкIагъэр ягъэгъотыгъэ­нымкIэ республикэм ипащэхэм яшIуагъэ къызэрагъакIорэр ащ ипсалъэ къыщыхигъэщыгъ.

Тренерым къызэриIуагъэмкIэ, зэнэкъокъу зэфэшъхьафхэм кIэух дэгъухэр къызэращигъэ­лъэгъуагъэм фэшI Ордэн Андзаур Урысыем и Олимпий­скэ хэшыпыкIыгъэ командэ хэ­хьанымкIэ амалышIухэр иIэх.

adygvoice.ru

 

 

 

Add comment

Name : *
Country :
E-mail :
Subject : *
Comment :
Users Comments